தித்லி ஆசனம் – பத்ராசனம்

Titli asana – Butterfly Pose. இன்று யோகாசனப் பயிற்சியானது உலக மக்களிடையே தனிக்கவனம் பெற்று வருகிறது. பல இளம் வயதினர் அழகை மேம்படுத்தவும் ஆரோக்கியத்தை பேணுவதற்காகவும் யோக பயிற்சியை நாடுகின்றனர்.

யோகாசனப் பயிற்சியானது அழகையும், ஆரோக்கியத்தையும் மட்டுமல்ல. உடலிலுள்ள நாடி, நரம்புகளையெல்லாம் சுத்தப்படுத்தும் வேலையையும் செய்வதால் மன அமைதியையும், நல்ல சிந்தனையையும் தரவல்லது.

மன அமைதியை தரக்கூடிய அதே  வேளையில் ஆரோக்கியத்தையும் தரக்கூடிய ”தித்லி” ஆசனம் என்னும் பத்ராசனத்தைப்பற்றியும் (Titli Asana – Butterfly Pose) அதை பயிற்சி செய்யும் முறையை பற்றியும் பார்ப்போம்.

Titli asana – Butterfly Pose Basic information

தித்லி ஆசனம் – அடிப்படை தகவல்கள்

பெயர் – Titli Asana.

தமிழில் -தித்லி ஆசனம், பத்ராசனம்.

சமஸ்கிருதம் – Titli Asana – Bhadrasana.

ஆங்கிலம் – Butterfly Pose.

வேறுபெயர்கள்

• Cobbler Pose
• Bhadrasana

ஆசனத்தின் நிலை – Meditation Pose, Seated Pose.

பயிற்சியின் கடின தன்மை – Advanced.

உடல் கோணம் – Meditative, Stretch.

Practice of Titli Asana

தித்லி ஆசனம் – செய்முறை

“Titli” என்றால் “வண்ணத்துப்பூச்சி” என்று பொருள். வண்ணத்துப்பூச்சி என்றால் சாதாரண வண்ணத்துப்பூச்சி அல்ல “வண்ணமயமான வண்ணத்துப்பூச்சி” என்று பொருள்.

இந்த ஆசனம் பார்ப்பதற்கு வண்ணத்துப்பூச்சியைப்போல் இருப்பதால் “வண்ணத்துப்பூச்சி ஆசனம்” (Titli Asana) என அழைக்கப்படுகிறது.

சரி, தித்லி ஆசனம் எப்படி பயிற்சி செய்வது என்பதனைப் பார்ப்போம்…

ஒரு கெட்டியான விரிப்பின் மீது இரண்டு கால்களையும் நீட்டியபடி உட்காரவும். அதன்பின் இரு உள்ளங்கால்களையும் ஒன்றாக சேர்த்து கும்பிட்டது போன்ற நிலையில் வைத்து இரண்டு முழங்கால்களையும் மடித்து உங்கள் இடுப்புக்கு அருகில் கொண்டு வாருங்கள். குதிகால்கள் பிறப்புறுப்பை தொட்ட நிலையில் இருக்கவும்.

இரண்டு கை விரல்களையும் ஒன்றாக கோர்த்து இரண்டு பாதங்களையும் ஒன்றாக இணைத்து பிடித்துக்கொள்ளவும். இந்த நிலையில் முழங்கால்கள் தரையில் படிந்தபடி இருக்கவேண்டும். இந்த நிலையில் உங்கள் முதுகு கூன் விழாமல் நேராக இருக்கும்படி பார்த்துக்கொள்ளுங்கள்.

ஆனால், நீங்கள் பயிற்சி செய்யும்போது பார்த்தீர்கள் என்றால்… முழங்கால்கள் தரையில் படியாமல் வண்ணத்துப்பூச்சியின் இறக்கைபோல சிறிது உயர்ந்து இருப்பதை பார்க்கலாம். அதற்காக கவலைப்பட வேண்டாம்.

வண்ணத்துப்பூச்சி இறக்கைகளை மேலும் கீழும் மெதுவாக அசைக்கும் அல்லவா?!அதுபோல மெதுவாக இரு தொடைப்பகுதிகளை மேலும் கீழுமாக 10 முதல் 15 தடவை அசைத்து அசைத்து கொஞ்சம் கொஞ்சமாக தரையில் பதிக்க முயற்சி செய்துவர சில மாத பயிற்சிக்குப்பின் கால்கள் தரையில் படிய ஆரம்பிக்கும்.

கால்களை மேலும் கீழும் அசைக்கும் பயிற்சியின்போது பட்டாம்பூச்சிகள் அதன் இறக்கைகளை அசைப்பது போன்ற ஒரு தோற்றத்தை தருவதால் இந்த ஆசனத்தை “வண்ணத்துபூச்சி இருக்கை” (Butterfly Pose) எனவும் பெயரிட்டு அழைக்கின்றனர்.

இதற்கு “செருப்பு தைப்பவரின் ஆசனம்” என்று மற்றொரு பெயரும் உள்ளது!.

செருப்பு தைப்பவர்களை பார்த்திருக்கிறீர்கள் அல்லவா?.. அவர்கள் செருப்பு தைக்கும்போது இந்த ஆசனத்தில்தான் அமர்ந்திருப்பார்கள்..

செருப்பு தைப்பவரை ஆங்கிலத்தில் “Cobbler” என்று குறிப்பிடுகின்றனர். எனவேதான் இந்த ஆசனத்தை “செருப்பு தைப்பவரின் ஆசனம்” என்ற அர்த்தத்தில் ஆங்கிலத்தில் “Cobbler Pose” என குறிப்பிடுகின்றனர்.

இதனை “பத்ராசனம்” எனவும் குறிப்பிடுகின்றனர்… “பத்ரா” என்றால் “அதிர்ஷ்டம்” அல்லது “மங்களகரமானது” என்று பொருள். பத்ராசனம் என்றால் “மங்களகரமான இருக்கை” என்று பொருள்.

சரி,… இனி பயிற்சியை தொடர்ந்து பார்ப்போம்…

பயிற்சியின் போது மூச்சை மெதுவாக நேர்த்தியாக ஒரே சீராக சுவாசிக்கவும். மனதையும் அமைதியாக வைத்திருங்கள். தோள்களையும் தளர்வாக வைத்திருங்கள்.

இந்த ஆசனத்தில் 2 நிமிடங்கள் இருக்கவும்.

இந்த பயிற்சியை திரும்ப திரும்ப 2 முதல் 5 தடவை செய்து வரவும்.

Benefits of Training

பயிற்சியின் பலன்கள்

இந்த பத்ராசனம் (Bhadrasana) என்னும் “தித்லி ஆசனம்” (Titli Asana) பயிற்சியை தொடர்ந்து செய்வதால் என்ன பலன்களெல்லாம் கிடைக்கும் என கேட்கிறீர்களா?..

உங்கள் எதிர்பார்ப்புக்கும் அதிகமாகவே இதில் பலன்கள் கிடைக்கின்றன.

”சங்கடம் போக்க சம்மணம் இடுங்கள்” என்று ஒரு பழமொழி உண்டு.. உண்மைதான்… தித்லி ஆசனம் பயிற்சியால் சங்கடங்கள் அகலும். முக்கியமாக மனதிற்கு அமைதியை கொடுத்து மகிழ்ச்சியைப் பெருக்குகின்றன.

இடுப்பு மற்றும் கணுக்கால்களின் நெகிழ்வு தன்மையை மேம்படுத்துகின்றன. கால் தசைகள் மற்றும் முதுகு பகுதிகளை வலுப்படுத்துகிறது.

குதிகால், முழங்கால், தொடை பகுதிகள் நன்கு பலம் பெறும். கால் நரம்புகள் புத்துணர்வு பெறும். பலபேர் முழங்கால் மூட்டுவலியால் அவதியுறுகின்றனர். அவர்களுக்கு இது சிறந்த ஆசனம் எனலாம்.

இந்த ஆசனத்தில் உடலை நேராக நிமிர்த்தி மூச்சை இழுத்து ஒரே சீராக நேர்த்தியாக விடுவதால் நுரையீரல் வலுபெறுகின்றன. முதுகெலும்புகள் பலம் பெறுகின்றன. வயிற்றின் உள்ளுறுப்புகள் நன்கு வேலை செய்ய தூண்டுகின்றன.

ஆண், பெண்களின் மலட்டுத்தனம் நீங்கும்.

பெண்களுக்கு மாதவிடாய் காலத்தில் ஏற்படும் வலிகளை நிவர்த்தி செய்கிறது. வயிற்று வலிகளையும் தணிக்கிறது. அதிக இரத்தப்போக்கை கட்டுப்படுத்துகிறது. மேலும் பெண்களின் கர்ப்பப்பையின் ஆரோக்கியத்தையும், பிறப்புறுப்பின் ஆரோக்கியத்தையும் மேம்பட செய்கிறது. இயற்கையாக பிரசவம் நடப்பதற்கு வழியையும் ஏற்படுத்திக் கொடுக்கிறது.

ஆண்களின் புரோஸ்டேட் சுரப்பிகளை இது மசாஜ் செய்வதால் அவற்றின் ஆரோக்கியம் மேம்பட்டு செயல்பாடுகள் அதிகரித்து விந்தணுக்களை பெருக்குகிறது. இந்த ஆசனம் செய்யும்போது இதனுடன் “தனுராசனம்” (Dhanurasana) என்னும் ஆசனத்தையும் செய்துகொண்டுவர ஆண்மை பன்மடங்கு அதிகரிக்கும்.

Important note

முக்கிய குறிப்பு

மூட்டுவலி, முழங்கால் மூட்டுவலிகளை வராமல் தடுக்கும் திறன் இதற்கு உண்டு என்பது உண்மைதான் என்றாலும், கணுக்கால்கள், முழங்கால்கள், இடுப்பு ஆகியவைகளில் வலிகளோ, வீக்கங்களோ, காயங்களோ, தசைபிடிப்புகளோ இருக்கும் சமயங்களில் இந்த ஆசனத்தை செய்தல்கூடாது.

இந்த ஆசனம் பெண்களுக்கு இயற்கையாக பிரசவம் நடப்பதற்கு வழி ஏற்படுத்திக் கொடுக்கிறது என்பது உண்மைதான் என்றாலும் கர்ப்பம் தரித்த முதல் மூன்று மாதங்களுக்கு இந்த ஆசனத்தை செய்யவே கூடாது. அது கரு சிதைவுக்கு வழிவகுத்துவிடும். கரு தரித்து நான்கைந்து மாதங்களுக்கு பின் இந்த பயிற்சியை செய்யலாம் என்றாலும் வயிறு, இடுப்பு, தொடைகள் மற்றும் கால்களுக்கு அதிக அழுத்தத்தை கொடுத்தல் கூடாது. தொடர்ந்தாற்போல அதிக நேரம் உடலை வருத்தி இதனை பயிற்சி செய்தலும் கூடாது. அது ஆபத்தில் முடியலாம்.

கர்ப்ப காலத்தில் அடிக்கடி தலைசுற்று, மயக்கம் உட்பட பல அசௌகரியங்களை சந்திக்கும் பெண்கள் இந்த ஆசனத்தை தவிர்க்கலாம்.

உங்களுக்கு சிறுநீரகத்தில் பிரச்னை உள்ளதா?… அப்படி என்றால் இந்த ஆசனம் செய்வதை தவிருங்கள்.

மூட்டுவலி அழற்சி, முடக்குவாதம் உள்ளதா?… அப்படி என்றால் இந்த ஆசனம் செய்வதை தவிருங்கள்.

நீங்கள் சமீபத்தில்தான் முழங்கால், இடுப்பு அல்லது முதுகெலும்பு அறுவை சிகிச்சை செய்து கொண்டீர்களா?… அப்படி என்றால் இந்த ஆசனம் உங்களுக்கானது அல்ல.

அதிகமான உடல்வலி அல்லது காயங்களால் உங்கள் காயம் கஷ்டப்பட்டு கொண்டிருக்கிறதா?!.. அப்படி என்றால் அது சரியாகும்வரை இந்த பயிற்சியை கொஞ்சம் தள்ளிப் போடலாமே?…

அதுபோல இதய பிரச்சனை உள்ளவர்களும் தொடர்ந்தாற்போல நெடுநேரம் இந்த ஆசனத்தை செய்தல் கூடாது.

The post Titli Asana – Butterfly Pose appeared first on Personality Fitting.

அர்த்த மத்ஸ்யேந்திராசனம்

உடலுக்கும் மனதிற்கும் ஒருசேர சக்தியூட்டுவது யோகாசனப் பயிற்சி எனலாம். பிற உடற்பயிற்சிகள் உடலுக்கு மட்டுமே பயிற்சியளிப்பன. ஆனால் யோகாசனப் பயிற்சியோ உடல், மனம் இரண்டையும் ஒருசேர இயக்குவதால் (Ardha Matsyendrasana) இப்பயிற்சியின் மூலம் மன வலிமையையும் பெற முடியும் என்பது திண்ணம்.

யோகாசனப் பயிற்சியானது வெளி உறுப்புகளைவிட உள் உறுப்புகளிலேயே தன் ஆளுமையை அதிகம் செலுத்துவதால் குன்றாத இளமையையும் மங்காத ஆரோக்கியத்தையும் தருகிறது.

யோகாசனப் பயிற்சியை ஒருவர் தொடர்ந்து பயின்றுவர நீடித்த ஆயுளையும், ஆரோகியத்தையும் ஒருசேர பெறுவர் என்பது திண்ணம். அவ்வாறான அற்புத பலனை தரக்கூடிய ஒரு ஆசனத்தை பற்றி இப்போது இந்த பதிவில் பார்க்க இருக்கின்றோம்.

”மத்ஸ்யேந்திரர்” (Matsyendranath) என்பவர் ஒரு தலைசிறந்த யோகி. அவர் பலவித ஆசனங்களை கற்று தேர்ந்தவர். அவர் ஒரு குறிப்பிட்ட ஆசனத்தில் அதிக அளவு நன்மை இருப்பதாக உணர்ந்தார். அதனால் அந்த யோகாசனத்தின் சிறப்புக்கருதி தன் மாணவர்களுக்கு அதனை போதித்தார். தொடர்ந்து அதனை பயிற்சி செய்துவர மாணவர்களை பணித்தார்.

எனவே, பின்னாளில் அவருடைய பெயராலேயே அந்த ஆசனமானது “மத்ஸ்யேந்திராசனம்” (Matsyendrasana) என அழைக்கப்பட்டுவருகிறது.

மத்ஸ்யேந்திராசனத்தில் உடல் இதற்கு மேலும் திருக்க முடியாது என்ற அளவிற்கு அதிக அளவில் திருகிய நிலையில் காணப்படும். அதனாலேயே அது “பூரண மத்ஸ்யேந்திராசனம்” என அழைக்கப்படுகிறது. ஆனால் இந்த பதிவில் “பூரண மத்ஸ்யேந்திராசனம்” (Poorna Matsyendrasana) பற்றி பார்க்கப்போவதில்லை. அதற்கு பதிலாக பாதி அளவு திருகிய நிலையில் உட்காரும் “அர்த்த மத்ஸ்யேந்திராசனம்” (Ardha Matsyendrasana) பற்றியே பார்க்கப் போகிறோம்.

Ardha Matsyendrasana – Basic information

அர்த்த மத்ஸ்யேந்திராசனம் – அடிப்படைத் தகவல்கள்

பெயர் – Ardha Matsyendrasana.

தமிழில் – அர்த்த மத்ஸ்யேந்திராசனம்.

சமஸ்கிருதம் – Ardha Matsyendrasana.

ஆங்கிலம் – Half Lord of the Fishes Pose.

வேறுபெயர்கள்

• Bound Half Lord of the Fishes Pose
• Baddha Ardha Matsyendrasana

ஆசனத்தின் நிலை – Sitting, Binding.

பயிற்சியின் கடின தன்மை – Intermediate.

உடல் கோணம் – Twist, Stretch.

“அர்த்த” என்றால் “பாதி” என்று பொருள். “அர்த்த மத்ஸ்யேந்திராசனம்” என்றால் பாதி அளவு மட்டுமே திருக்கப்பட்ட நிலையில் உட்காரும் மத்ஸ்யேந்திராசனம் என்று பொருள்.

பாதி மத்ஸ்யேந்திராசனம் என்றாலும் பல நோய்களையும் பாழாக்கும் திறன் படைத்தது.

இவ்வாசனமானது இடுப்புவலி, முதுகுவலி மற்றும் நரம்புத் தளர்ச்சி போன்ற பிரச்சனைகளை தீர்ப்பதில் சிறப்பு பெற்றது. இந்த ஆசனத்தை முறையாக பயிற்சி செய்வது எப்படி என்பதை இப்போது பார்ப்போம்.

Practice of Ardha Matsyendrasana

அர்த்த மத்ஸ்யேந்திராசனம் – செய்முறை

முதலில் விரிப்பில் நேராக உட்கார்ந்து இரு கால்களையும் முன்னோக்கி நேராக நீட்டிக்கொள்ளவும். பின் இடதுகாலை வலது காலின் தொடைப்பகுதிக்கு கீழ்வரும்படி மடக்கிக்கொள்ளவும். அதன் பின் வலது காலை இடதுகாலின் வெளிப்புறத்தில் கொண்டுவந்து முழங்கால் நேராக மேல் நோக்கி இருக்கும்படி மடக்கி ஊன்றவும்.

வலதுகால் பாதத்தை இடதுகையால் பிடித்துக்கொண்டு வலதுகையை பின்புறமாக ஊன்றிக் கொள்ளவும். பின் இடுப்பின் மேல் பாகத்தை வலது பக்கமாய் மெதுவாக திருக்கவும். முதுகு நேராக இருக்கவேண்டியது முக்கியம். மூச்சை இயல்பாக விடவும்.

10 முதல் 30 வினாடிகள் இதே நிலையில் அமர்ந்து இருக்கவும். பின் மெதுவாக இயல்பு நிலைக்கு வரவும். பின் சில வினாடி ஓய்வுக்குப்பின் கால்களை மாற்றி மறுபக்கம் இதுபோல் பயிற்சி செய்யவும்.

இதேபோல் கால்களை மாற்றி மாற்றி திரும்ப திரும்ப இப்பயிற்சியை இரண்டு மூன்று தடவை செய்யவும்.

Benefits of Training

பயிற்சியின் பலன்கள்

கழுத்து மற்றும் தோள்களுக்கு சிறந்ததொரு பயிற்சியை கொடுக்கிறது. மேலும் முதுகு, இடுப்பு, கால்களை வலுப்படுத்துகிறது. முதுகெலும்புகள் நன்கு நெகிழ்வு தன்மை பெறுவதோடு நல்ல பலத்தை பெறுகின்றன. 

வயிற்று தசைகளை வலு பெற செய்வதோடு அஜீரணத்தை நீக்கி ஜீரண சக்தியையும் அதிகப்படுத்துகின்றன.

நரம்பு தளர்ச்சியை குணமாக்குகின்றன.

இதயம், கல்லீரல், நுரையீரல், மண்ணீரல், சிறுநீரகம் முதலியன நன்கு பலம் பெறுகின்றன.

தொந்தி குறையும். குடல்கள் நன்கு இரத்த ஓட்டம் பெறுவதோடு ஜீரண மண்டலமும் நன்கு வலிமை பெறும். மலச்சிக்கல் நீங்கும். நீரழிவு குணமாகும்!

பெண்களுக்கு மாதவிடாய் அசௌகரியங்களை போக்குகின்றன. குறிப்பாக மாதவிடாய் சூழற்சியை ஒழுங்குபடுத்துகிறது. ஹார்மோன்களை சமநிலைப்படுத்துகிறது.

எல்லாவற்றிற்கும் மேலாக மன அமைதியை கொண்டுவரும் அற்புதமான ஆசனம்.

Important note

முக்கிய குறிப்புகள்

கடுமையான முதுகு அல்லது கழுத்துவலி உள்ளவர்கள் இந்த பயிற்சியை தவிர்க்க வேண்டும். உள்ளுறுப்புகளில் எதாவது வலி இருப்பதாக உணர்ந்தால் பயிற்சியை தவிர்க்கவும்.

மூட்டு வலி உள்ளவர்களும், பலவீனமான மூட்டுகளை கொண்டுள்ள முதியவர்களும் இந்த பயிற்சியை கைவிட்டு வேறு எளிமையான பயிற்சிகளை தேர்ந்தெடுத்து செய்துவரலாம்.

மூலநோய், குடலிறக்கம், வயிற்றுப்புண் உள்ளவர்கள் இப்பயிற்சி செய்வதை தவிர்க்கவும்.

கர்பிணிப் பெண்கள் இந்த ஆசனத்தை கண்டிப்பாக கைவிட வேண்டும்.

The post Ardha Matsyendrasana appeared first on Personality Fitting.

உட்கட்டாசனம்

Utkatasana – Chair pose. உங்கள் வீடு சாலைகளின் ஓரங்களில் அமைந்துள்ளதா? அப்படியென்றால் இந்த காட்சியை நீங்கள் கண்டிப்பாக பார்த்திருக்கலாம்.

அதிகாலை 4 அல்லது 5 மணிக்கு எழுந்து (முறைக்காதீர்கள் இன்று ஒருநாள் மட்டும் சூரிய உதயத்தை பார்ப்பதற்காவது எழுந்து உட்காருங்கள்)  சாலையை எட்டிப் பார்த்தீர்கள் என்றால் வயது வித்தியாசம் இல்லாமல் பலபேர் அரைக்கால் டவுசர் போட்டுக்கொண்டு காதில் எதையோ மாட்டிக்கொண்டு எங்கோ அவசரமாக நடந்து சென்று கொண்டிருப்பார்கள்.

அவர்களை தடுத்து நிறுத்தி எங்கே இவ்வளவு அவசரமாக சென்று கொண்டிருக்கிறீர்கள் என்று கேட்டால் தெரியவில்லை என்பார்கள். கொஞ்சம் வற்புறுத்தி கேட்டால் டாக்டர்தான் இப்படி நடக்க சொன்னதாகவும், நடந்தால் ”ஹார்ட் அட்டாக்” வராது என்று அறிவுறுத்தியதாகவும் சொல்வார்கள்.

சரி..  உங்கள் டாக்டர் எத்தனை நாள் இப்படி ”பை பாஸ்” ரோட்டில்  நடக்க சொன்னார் என்றால் பதில்கூற தெரியாது.

சரி.. டாக்டரிடமே கேட்டோம் என்றால் ”பைபாஸ் சர்ஜரி” செய்யும் வரை ”பைபாஸ் ரோட்” டில் நடக்க வேண்டும் என்பார். (போங்கடா நீங்களும் உங்க ”அட்வைஸ்”ம்).

சிறிது காலத்திற்கு பிறகு அதிகமாக நடந்ததால் மூட்டு எலும்பு தேய்ந்து விட்டதாக கூறி அதற்கு தனியாக ஒரு கால் மூட்டு பெல்ட்டும்.. மூட்டுவலி தீர வலிநிவாரண மாத்திரையும் எக்ஸ்ட்ராவாக லிஸ்ட்டில் ஏறும் என்பது வேறு கதை.

பைபாஸ் ரோட்டில் நடப்பதால் இன்னும் ஒரு பிரச்சனை இருக்கிறது. பிரேக் பிடிக்காமல் பின்னால் வரும் ஆட்டோ, மினி பஸ் முதலியன இப்பவே நம்மை பைபாஸ் சர்ஜரிக்கு அனுப்பி வைத்து விடுமோ என்று பயம் வேறு.

சரி இதற்கு வேறு தீர்வே இல்லையா?

கண்டிப்பாக இருக்கிறது.

இதோ நான் சொல்லப்போகும் பயிற்சியை உங்கள் வீட்டிற்குள்ளேயே தினம் காலை, மாலை 5 நிமிட நேரம் பயிற்சி செய்தால் போதும். மூட்டெலும்பு தேய்வு ஏற்படாமலேயே கால் மூட்டிற்கு வலுவை தருவதுடன் 5 km நடந்ததற்கான பலனும் கிடைத்து விடும்.

நாம் இப்போது இங்கே பார்க்கப்போவது “உட்கட்டாசனம்” – Utkatasana என்னும் நாற்காலி ஆசனம் (Chair pose). இது கால்கள், இடுப்பு, தோள்கள் மற்றும் முதுகெலும்பை பலப்படுத்த உதவுகிறது. வாருங்கள் பார்க்கலாம்.

Utkatasana – Chair pose – Basic information

உட்கட்டாசனம் – அடிப்படைத் தகவல்கள்

பெயர் – Utkatasana.

தமிழில் – நாற்காலி ஆசனம்.

சமஸ்கிருதம் – Utkatasana.

ஆங்கிலம் – Chair pose.

வேறுபெயர்கள் – Fierce Pose, Awkward Pose.

ஆசனத்தின் நிலை – Standing.

பயிற்சியின் கடின தன்மை – Intermediate.

உடல் கோணம் – Forward-Bend, Stretch, strength, Balance.

இந்த ஆசனத்தை தொடர்ந்து செய்துகொண்டு வந்தீர்களானால் இந்த உட்கட்டா ஆசனத்தால் உங்கள் உடலின் உள்கட்டமைப்பு அத்தனையும் பலம் பெறும் என்பதில் சந்தேகமில்லை.

ஒரு நாற்காலியில் உட்காருவதுபோல் பாவனை செய்வதுதான் இந்த ஆசனத்தின் நிலை.

இந்த ஆசனம் (Utkatasana) பார்ப்பதற்கு எளிதானது போல் உங்களுக்கு காட்சி தரலாம். ஆனால் நிஜம் அப்படியல்ல… நாற்காலியில் உட்காருவது எளிதுதான். ஆனால் இல்லாத நாற்காலியில் உட்காருவது என்பது அவ்வளவு சுலபமானது அல்ல.

யாருமே இல்லாத டீ கடையில் யாருக்கு டீ ஆற்றுகிறோம் என்று தெரியாமலேயே டீ ஆற்றுவது எவ்வளவு வலி தரும் நிகழ்வோ அப்படியானதுதான் இதுவும்.

சரி, இனி இந்த ஆசனத்தை எவ்வாறு பயிற்சி செய்வது என்பதனை பார்ப்போம்….

Practice of Utkatasana

உட்கட்டாசனம் – செய்முறை

முதலில் நேராக நிமிர்ந்து நிற்கவும். பின் இரு கால்களுக்கும் இடையில் 1 அடி இடை வெளி இருக்கும்படி கால்களை விரித்து வைக்கவும். இரு கைகளையும் கிடைமட்டமாக முன்னோக்கி நேராக நீட்டவும்.

பின் உடலை மெதுவாக கிழிறக்கி நாற்காலியில் உட்காருவது போல் உட்காரவும். முன்பக்கமாக உடலை வளைக்கக் கூடாது. முதுகு நேராக மேல்நோக்கி இருக்க வேண்டும். இயல்பாக மூச்சு விடவும்.

இதே நிலையில் 10 முதல் 30 வினாடிகள் இருக்கவும். பின் மெதுவாக நேராக நிமிர்ந்து நிற்கவும். சில வினாடிகள் ஓய்வு எடுத்தபின் மீண்டும் முன்போல செய்யவும்.

இதேபோல் 4 அல்லது 5 தடவை இப்பயிற்சியை மேற்கொள்ளலாம்.

Benefits of Training

பயிற்சியின் பலன்கள்

இந்த பயிற்சியானது உங்கள் தசைகளை அற்புதமாக வலுப்படுத்துகிறது. கால் மூட்டுகளை பலப்படுத்துகிறது. அதன் ஆரோக்கியத்தை மேம்படுத்துகிறது. இடுப்பு, முதுகெலும்பு, தோள்பட்டை பலம் பெறுகிறது.

இந்த பயிற்சியை தொடர்ந்து செய்து வருவதால் கால்வலி, இடுப்புவலி, மூட்டுவலி, முழங்கால், குதிகால் வலிகள் நீங்கும்.

வயிற்றுப்பகுதிகளில் உள்ள நாளமில்லா சுரப்பிகளை தூண்டும்.

5 நிமிடம் இப்பயிற்சியை செய்ய 5km நடைப்பயிற்சி செய்ததற்கான பலனையும், இன்னும் கூடுதலான நன்மைகளையும் பெறமுடியும்.

இதனுடன் இதயத்திற்கு வலிமை சேர்க்கும் சில எளிய யோக பயிற்சிகளையும் மருத்துவரின் ஆலோசனை பெற்று செய்துவர இரண்டு விதமான ”பைபாஸ்” ம் தேவைப்படாததோடு அனைத்து விதமான இதய நோய்களையும் தவிர்த்து விட முடியும்.

இந்த பயிற்சியால் படிப்படியாக தொப்பையையும் குறைக்க முடியும்.

விளையாட்டு வீரர்களுக்கு அதுவும் குறிப்பாக ஓட்டப்பந்தய வீரர்களுக்கு இந்த பயிற்சி ஒரு வரப்பிரசாதம் என்றால் அது மிகையில்லை.

Important note

முக்கிய குறிப்புகள்

வயதானவர்கள் மற்றும் கர்ப்பிணி பெண்கள் இந்த ஆசனம் செய்வதை தவிர்த்தல் வேண்டும். உயர் இரத்த அழுத்தம், தலைசுற்றல் போன்ற உடல் நல பிரச்சனைகள் உள்ளவர்களும் இந்த ஆசனத்தை தவிர்த்தல் வேண்டும். உடலில் காயம் பட்டுள்ளவர்கள் இந்த ஆசனத்தை தவிர்த்தல் நலம்.

The post Utkatasana – Chair pose appeared first on Personality Fitting.

உத்தித பத்மாசனம்

பத்மாசனம் பார்த்திருக்கிறீர்கள் அல்லவா?… அதனுடைய “அப்டேட் வெர்சன்”தான் இந்த உத்தித பத்மாசனம். (Utthita Padmasana – Tulasana). ”உத்தித” என்றால் சமஸ்கிருதத்தில் “உயர்த்துதல்” அல்லது “தூக்குதல்” என்று பொருள். பத்மாசன நிலையில் இருந்தபடியே உடலை தரையில் இருந்து மேலே உயர்த்துவதால் இந்த ஆசனம் “உத்தித பத்மாசனம்” (Utthita Padmasana) என அழைக்கப்படுகிறது.

தரையில் உட்கார்ந்தபடி செய்வது பத்மாசனம் என்றால் அதே பத்மாசனத்தை அந்தரத்தில் செய்தால் அதுவே ”உத்தித பத்மாசனம்” ஆகும். “Elevated” என்றால் ஆங்கிலத்தில் “உயர்த்தப்பட்ட” என்று அர்த்தம். எனவேதான் ஆங்கிலத்தில் இது “உயர்த்தப்பட்ட தாமரை ஆசனம்” என்று பொருள்படும்படி “Elevated lotus Pose” என அழைக்கப்படுகிறது.

இதனை சமஸ்கிருதத்தில் “துலாசனம்” (துலாம் +ஆசனம்) எனவும் அழைக்கின்றனர். “துலாம்” என்பது தராசை குறிக்கும். இந்த ஆசனத்தில் இருக்கும்போது உடலின் அமைப்பு பார்ப்பதற்கு பொருள்களை எடை போடும் “தராசு” போல் இருப்பதால் இதனை சமஸ்கிருதத்தில் “துலாசனம்” எனவும். தமிழில் “தராசு ஆசனம்” எனவும் அழைக்கின்றனர். “தராசு” ஆங்கிலத்தில் “ஸ்கேல்” என்று அழைக்கப்படுகிறதல்லவா அதனால் இந்த ஆசனம் ஆங்கிலத்தில் “Scale Pose” என குறிப்பிடப்படுகிறது.

இதற்கு சமஸ்கிருதத்தில் இன்னும் ஒரு பெயரும் இருக்கிறது. அதுதான் “Utpluthih asana” (உட்ப்ளுதிஹ் ஆசனம்). “உட்ப்ளுதிஹ்” என்றால் சமஸ்கிருதத்தில் “தூக்குதல்” அல்லது “வேரோடு பிடுங்குதல்” என்று பொருள். இந்த ஆசனத்தில் மொத்த உடலும் இரு கைகள் மூலம் மேலே தூக்கப்படுவதால் இதற்கு “உட்ப்ளுதிஹ் ஆசனம்” (Utpluthih asana) என்று பெயர்.

Utthita Padmasana – Tulasana – Basic information

உத்தித பத்மாசனம் – அடிப்படைத் தகவல்கள்

பெயர் – Utthita Padmasana.

தமிழில் – உத்தித பத்மாசனம்.

சமஸ்கிருதம் – Tulasana. (துலாசனம்), Utpluthih asana (உட்ப்ளுதிஹ் ஆசனம்).

ஆங்கிலம் – Scale Pose.

வேறுபெயர்கள் – Elevated lotus Pose.

ஆசனத்தின் நிலை – Sitting.

பயிற்சியின் கடின தன்மை – Intermediate.

உடல் கோணம் – Strength, Balance.

இந்த ஆசனம் பழகுவது கொஞ்சம் கடினம் என்றாலும் இந்த ஆசனத்தை முறையாகப் பயிற்சி செய்வதால் உடல் தேக்கு போல் வலிமையாகும் என்பது உறுதி. பத்மாசனத்தில் நன்கு பயிற்சி பெற்ற பின்பே இந்த ஆசனத்தை செய்ய முயற்சி மேற்கொள்ள வேண்டும்.

மேலும் இந்த ஆசனம் பத்மாசன நிலையில் உட்காருவதால் இடுப்பு, தொடைகள், மூட்டு, முழங்கால்கள் அனைத்தும் பலமாகும். இந்த ஆசனம் செய்வது ஆரம்பத்தில் கொஞ்சம் கடினம் என்றாலும் முறையாகப் பயிற்சி செய்வதால் அடையும் பலனோ ஏராளம்.

சரி, இனி இந்த ஆசனத்தை எவ்வாறு பயிற்சி செய்வது என்பதனை பார்ப்போம்….

Practice of Utthita Padmasana

உத்தித பத்மாசனம் செய்முறை

Continue the practice for – Utthita Padmasana. முதலில் பத்மாசனத்தில் முதுகு வளையாமல் நேராக நிமிர்ந்து உட்காரவும்.

[“பத்மாசனம்” செய்வது எப்படி என்பதனை ”பத்மாசனம்” என்ற தலைப்பின் கீழ் காண்க. அல்லது, இந்த கட்டுரையின் முடிவில் தரப்பட்டுள்ள சுட்டியை சுட்டி இங்கிருந்தே நேராக பத்மாசனத்திற்கு செல்லுங்கள்].

பத்மாசனத்தில் நேராக அமர்ந்த பின் இரு கைகளையும் இரு கால்களின் பக்கவாட்டில் விரல்கள் முன்பக்கம் இருக்குமாறு ஊன்றவும்.

பின் பத்மாசன நிலையில் இருந்தபடியே கைகளை ஊன்றிய நிலையில் மூச்சை உள்ளிழுத்தபடி உடலை மெதுவாக மேலே தூக்கவும். உடல் நிமிர்ந்த நிலையில் இருக்கும்படி பார்த்துக்கொள்ளவும். சிறிது நேரம் இதே நிலையில் இருக்கவும். மூச்சை ஆழமாக இழுத்து சுவாசிக்கவும்.

அதன் பின் மெதுவாக உடலை கீழே இறக்கவும். சில விநாடி ஓய்வுக்குப்பின் மீண்டும் பயிற்சி எடுக்கவும். இந்த ஆசனத்தை 3 அல்லது 5 தடவை செய்யலாம்.

ஆரம்பத்தில் 5 விநாடி நேரம் இதே நிலையில் இருக்கப் பழகி அதன்பின் 30 முதல் 40 விநாடி நேரம் இருக்க பயிற்சி எடுக்கவும்.

Benefits of Training

பயிற்சியின் பலன்கள்

உத்தித பத்மாசனம் செய்வதால் மணிக்கட்டு, இரு கைகள், கை விரல்கள், உள்ளங்கை, தோள்பட்டை, மூட்டு பகுதிகள், முதுகெலும்பு, இடுப்பு, பிட்டம், தொடைகள், முழங்கால்கள், வயிறு, வயிற்று தசைகள் பலம் அடைகின்றன. ஜீரண உறுப்புகள் வளம் பெறுவதோடு வாயு தொல்லையும் நீங்குகின்றன.

இப்பயிற்சிமூலம் ஜீரணமண்டலம் அதிகம் அழுத்தப்பட்டு இரத்த ஒட்டம் அதிகரிப்பதால் ஜீரண சக்தி அதிகரிக்கும். குடலிறக்கம் தடுக்கப்படும். கைகளின் தசைகளுக்கும் எலும்புகளுக்கும் அதிக வலுவைத்தரும். வயிற்று தசைகள் இறுக்கப்பட்டு தொந்தி மறையும்.

அதுமட்டுமல்ல ஜீரண உறுப்புகள் மற்றும் இதயம், சுவாசம் சம்பந்தப்பட்ட அனைத்து உள்ளுறுப்புகளும் வலிமைபெறும்.

Important note

முக்கிய குறிப்புகள்

கைகள், தோள்கள், மணிகட்டுகளில் சுளுக்கு, தசைபிடிப்பு மற்றும் காயங்கள் எதாவது இருந்தால் இந்த ஆசனத்தை பயிற்சி செய்ய வேண்டாம்.

முதுகு, இடுப்பு, மார்பு பகுதிகளில் சமீபத்தில் அறுவை சிகிச்சை செய்திருந்தால் இந்த ஆசனத்தை தவிர்க்கவும்.

உயர் இரத்த அழுத்தம் உள்ளவர்கள் இந்த ஆசனத்தை தவிர்க்கவும்.

உடலின் மொத்த எடையையும் கைகளே தாங்குவதால் பலவீனமான கைகள் மற்றும் எலும்புகளை கொண்டவர்கள் தயவு செய்து இதனை செய்ய முயற்சிக்க வேண்டாம்.

தூக்கமின்மையால் அவதியுறுபவர்கள், எப்போதும் பதட்டமாகவே இருப்பவர்கள் இந்த ஆசனத்தை செய்யும்போது மிகவும் கவனமுடன் இருக்கவேண்டும். ஏனென்றால் இந்த ஆசனம் செய்யும்போது விரைவான சுவாசம் ஏற்படலாம். அந்த சமயத்தில் மனம் அமைதியாக இல்லாவிட்டால் எதிர்மறையான பலன்களை உண்டாக்கலாம்.

The post Utthita Padmasana – Tulasana appeared first on Personality Fitting.

பத்மாசனம் – கமலாசனம்

”பத்மம்” என்றால் தாமரையை குறிக்கும். ”கமலம்” என்றாலும் தாமரையைத்தான் குறிக்கும். எனவே இந்த ஆசனம் ”பத்மாசனம்” என்றும், ”கமலாசனம்” Padmasana – Kamalasana என்றும் அழைக்கப்படுகிறது. பத்மாசனம் அல்லது கமலாசனம் என்றால் ”தாமரை ஆசனம்” என்று பொருள்.

மேலேயுள்ள படத்தைப் பாருங்கள்…. மடக்கி வைக்கப்பட்டிருக்கும் இரு கால்களும் பார்ப்பதற்கு தாமரை பூவின் இதழை போன்ற வடிவத்தில் இருக்கிறதல்லவா!… அதனால்தான் இந்த ஆசனத்திற்கு ”பத்மாசனம்” மற்றும் ”கமலாசனம்” என பெயர் சூட்டப்பட்டுள்ளது.

தியானம், ப்ராணாயாமம் என்னும் மூச்சு பயிற்சி செய்வதற்கு பெரும்பாலானவர்கள் இந்த ஆசனத்தையே தேர்ந்தெடுக்கின்றனர். அந்த அளவிற்கு மனதை ஒருமுகப்படுத்துவதற்கு ஒத்துழைப்பு கொடுக்கும் அற்புதமான ஆசனம்.

சரி, இனி இந்த ஆசனத்தை எவ்வாறு பயிற்சி செய்வது என்பதனை பார்ப்போம்….

Padmasana – Kamalasana – Basic information

பத்மாசனம் – அடிப்படைத் தகவல்கள்

பெயர் – Padmasana – Kamalasana.

தமிழில் – பத்மாசனம் – கமலாசனம்.

சமஸ்கிருதம் – Padmasana.

ஆங்கிலம் – Lotus Pose.

வேறுபெயர்கள் – தாமரை ஆசனம்.

ஆசனத்தின் நிலை – Sitting.

பயிற்சியின் கடின தன்மை – Intermediate.

உடல் கோணம் – Restorative, Meditative, Pranayama.

Practice of Padmasana – Kamalasana

பத்மாசனம் – செய்முறை விளக்கம்

Continue the practice for Padmasana – Kamalasana. ஒரு விரிப்பின் மீது இரண்டு கால்களையும் நீட்டியபடி உட்காரவும். முதலில் வலதுகாலை மடித்து கணுக்காலை இரு கரங்களாலும் பற்றி தூக்கி இடது தொடைமீது வைக்கவும்.

அதே போல் இடதுகாலை மடித்து இரு கரங்களாலும் பற்றி தூக்கி மெதுவாக வலது தொடைமீது வைக்கவும். பிறகு முதுகெலும்பு நேராக இருக்கும்படி நிமிர்ந்து உட்காரவும்.

இரண்டு முழங்கால்களும் தரையை தொட்டபடி இருக்கவேண்டும். கைகள் இரண்டையும் முழங்கால்மீது சின்முத்திரை பிடித்தபடி வைக்கவும். மூச்சை நன்கு இழுத்து அதே வேளையில் மெதுவாக நேர்த்தியாக ஒரேசீராக சுவாசிக்கவும்.

இது சொல்வதற்கு எளிதாக தோன்றலாம். ஆனால் செய்வதற்கு கொஞ்சம் கஷ்டம். முழங்கால்களும், பாதங்களும் ஆரம்பத்தில் விண்ணென்று வலிக்கும். தொடர்ந்து பயிற்சியெடுக்க வலி மறையும்.

இந்த ஆசனத்தில் 5 நிமிடங்கள் இருக்கவும். ஆரம்பக்கட்டத்தில் 5 நிமிடம் இருப்பது கடினமாக இருக்கலாம். ஓரிரு நிமிடங்கள் ஆரம்பத்தில் இருக்கப் பழகி படிப்படியாக 5 நிமிடங்கள் இருக்க பயிற்சி எடுக்கவும்.

5 நிமிடம் பயிற்சி முடிந்த பின் ஒவ்வொரு காலாக கைகளால் பிடித்து கீழே இறக்கி வைக்கவும். பின் முன்போல் கால்களை நேராக நீட்டிக் கொள்ளவும். சில வினாடிகள் ஓய்வு எடுத்தபின் காலை மாற்றி போட்டு பயிற்சி எடுக்கவும். அதாவது வலது காலை மடிப்பதற்கு பதிலாக இப்பொழுது இடது காலை மடித்து இரு கரங்களாலும் பற்றி தூக்கி மெதுவாக வலது தொடைமீது வைக்கவும். அதன்பின் வலதுகாலை மடித்து கணுக்காலை இரு கரங்களாலும் பற்றி தூக்கி மெதுவாக இடது தொடைமீது வைக்கவும்.

இதே நிலையில் 5 நிமிடங்கள் இருக்கவும். முதுகு வளையாமல் நேராக இருக்க வேண்டியது மிக முக்கியம் என்பதனை கவனத்தில் கொள்ளவும்.

Benefits of Training

பயிற்சியின் பலன்கள்

இந்த ஆசனத்தை தொடர்ந்து பயின்றுவர முழங்கால்கள் நன்கு வலுப்பெறும். முழங்காலில் மூட்டுவலிகள் நீங்கும். குதிகால் நரம்புகள் பலம் பெறும். கால் வலி மற்றும் முதுகு வலிகள் குணமாகும். இது செரிமான மண்டலத்தை மேம்படுத்துவதால் ஜீரணசக்தி அதிகரித்து சுறுசுறுப்பு உண்டாகும். வயிற்றுவலி நீங்கும். தொந்தி கரையும்.

இது முதுகுத்தண்டு மற்றும் வயிற்றுப்பகுதிகளை வலுப்படுத்துகிறது.

தியானம் செய்வதற்கு ஏற்ற ஆசனம். தியானம் செய்வதற்கு இந்த ஆசனம் கடினமாக இருப்பதாக நீங்கள் உணர்ந்தால் ஸ்வஸ்திகாசனம், வஜ்ராசனம் போன்ற எளிதாக அமரக்கூடிய ஆசனங்களை தேர்ந்தெடுத்து பயன்படுத்தி வரலாம்.

The post Padmasana – Kamalasana appeared first on Personality Fitting.

பாத ஹஸ்தாசனம்

Patha Hastasana – Hand to Foot Pose. யோகம் என்ற பதத்திற்கு ”ஒருமுகப்படுத்துதல்” மற்றும் ”இணங்கியிருத்தல்” என்று பொருள். அலைபாயாமல் அமைதியாக இருக்கும் மனதில்தான் சாந்தி நிலவும் சாந்தியும், சமாதானமும் நிலவும் மனதில்தான் ஆரோக்கியமும், ஆனந்தமும் நிலைகொண்டு இருக்கும்.

இதனை கருத்தில் கொண்டே சான்றோர்கள் மனதையும், உடலையும் புலன்களின்பால் அலைபாயாமல் ஒருமுகப்படுத்தி ஒரே நிலையில் சிறிதுநேரம் அமர்ந்திருந்து பயிற்சி செய்யும் முறையை நமக்கு கொடையாக தந்துள்ளனர். அப்பயிற்சியே “யோகாசனம்” எனப்படுகிறது.

நாம் உடலுக்கும் மனத்திற்கும் ஆரோக்கியம் தரும் பலவித யோக பயிற்சிகளை தொடர்ந்து பார்த்துவருகிறோம். அந்த வரிசையில் இன்று “பாத ஹஸ்தாசனம்” என்னும் பயிற்சியைப்பற்றி பார்க்க இருக்கிறோம்.

Patha Hastasana – Basic information

பாத ஹஸ்தாசனம் – அடிப்படைத் தகவல்கள்

பெயர் – Patha Hastasana.

தமிழில் – பாத ஹஸ்தாசனம்.

சமஸ்கிருதம் – Patha Hastasana.

ஆங்கிலம் – Hand to Foot Pose.

வேறுபெயர்கள் – Standing Forward Bend hands Under Feet Pose,

ஆசனத்தின் நிலை – Standing, Hand to Feet.

பயிற்சியின் கடின தன்மை – Intermediate.

உடல் கோணம் – Forward Bend, stretch, Inversion.

“பாதம் ஹஸ்தம் ஆசனம்” என்பதையே “பாத ஹஸ்தாசனம்” என்கிறோம்.

இதில் “பாதம்” என்பது காலின் பாதங்களை குறிப்பது. “ஹஸ்தம்” என்பது உள்ளங்கைகளை குறிப்பது.

உடலை வளைத்து கைகளால் கால்பாதங்களை தொடுவதால் இதற்கு “பாத ஹஸ்தாசனம்” (Patha Hastasana) என்று பெயர்.

இனி, இதனை எவ்வாறு பயிற்சி செய்வது என்பதனை பார்ப்போம்.

Practice of – Patha Hastasana

பாத ஹஸ்தாசனம் – பயிற்சி முறை

இரண்டு கால்களையும் சேர்த்துவைத்துக்கொண்டு நேராக நிற்கவும்.

இரண்டு கைகளையும் காதுகளை ஒட்டினாற்போல மேல்நோக்கி நேராக உயர்த்தவும்.

மூச்சை ஒருதடவை நன்றாக உள்ளுக்கிழுத்து பின் மூச்சை மெதுவாக வெளியே விட்டபடியே மெதுவாக முன்பக்கமாக குனிந்து கைகளால் காலின் பெருவிரல்களை தொடவும். அல்லது தரையை தொடவும்.

அவ்வாறு தொடும்போது தலை முழங்காலை தொட்டுக்கொண்டிருக்கும்படி வைக்கவும். உடலில் இடுப்பு மட்டுமே வளைய வேண்டுமேயொழிய முழங்கால்கள் மடங்குதல் கூடாது.

எனவே கால்களை வளைக்காமல் விரைப்பாக வைத்துக்கொள்ளவும்.

எடுத்த எடுப்பிலேயே தலை முழங்காலை தொடும் அளவுக்கெல்லாம் பயிற்சி செய்ய முடியாது… ஏனெனில் உங்கள் உடல் அந்த அளவிற்கெல்லாம் வளைந்து கொடுக்காது. எனவே உங்கள் உடல் எந்த அளவிற்கு ஒத்துழைப்பு கொடுக்கிறதோ அந்த அளவிற்கு முயற்சி செய்தால் போதுமானது. உடலில் வலி ஏற்படும் அளவுக்கு அதிகப்படியாக உடலை வருத்துதல் கூடாது. ஆரம்பத்தில் உங்களால் வலி ஏற்படாத அளவுக்கு எவ்வளவு குனிய முடியுமோ அவ்வளவு முயற்சி செய்தால் போதுமானது. மாதங்கள் செல்லச்செல்ல தலை முழங்காலை தொடும் அளவுக்கு உடல் துவளும் தன்மையை பெற்றுவிடும்.

இதே வகையில் “உத்தனாசனம்” என்று மற்றொரு பயிற்சி முறையும் உள்ளது. அதுவும் பார்ப்பதற்கு இதேபோன்று தோற்றமளித்தாலும் இதைவிட கொஞ்சம் கடினமான பயிற்சி.

ஏனெனில், பாதஹஸ்த ஆசனத்திலுள்ளதுபோல கைகளால் பாதம் அல்லது தரையை தொடுவதோடு நிறுத்திக்கொள்ளாமல் இன்னும் நன்கு உடலை வளைத்து உள்ளங்கைகளை தரையில் ஊன்ற வேண்டும். அந்த பயிற்சியையும் அடுத்து பார்க்க இருக்கிறோம்.

சரி,.. இப்போது இந்த பாதஹஸ்த முறையில் பெருவிரலை தொட்டபடி அல்லது தரையை தொட்டபடி 10 வினாடிகள் இருக்கவும். மூச்சை இயல்பாக விடலாம்.

பின்னர் இரண்டு கைகளையும் காதுகளை ஒட்டியபடியே வைத்துக்கொண்டு மூச்சை உள்ளுக்கிழுத்தபடியே மெதுவாக நிமிர்த்து நிற்கவும். பின் மூச்சை வெளிவிட்டபடியே கைகளை கீழே இறக்கவும்.

பத்து அல்லது 20 வினாடி ஓய்வுக்குப்பின் மீண்டும் முன்போலவே செய்யவும்.

இவ்வாறு திரும்ப திரும்ப 7 முதல் 8 தடவை இந்த பயிற்சியை செய்யவும்.

Benefits of Training

பயிற்சியின் பலன்கள்

இப்பயிற்சியினால் இடுப்பும், வயிற்றின் உள்ளுறுப்புகளும் நன்கு பலமடைகின்றன. கால்களும் நன்கு பலம் பெறுகின்றன. மூளைக்கு புதிய இரத்தம் பாய்ந்து சுறுசுறுப்படைகின்றன.

இப்பயிற்சியால் அதிக அளவு இடுப்புச்சதைகள் குறைவதோடு அதிகப்படியான தொந்தியும் மறைகின்றன.

தொடர் பயிற்சியால் வயிற்றின் உள்ளுறுப்புகள் அழுத்தப்பட்டு பலம் பெறுகின்றன. குறிப்பாக கணையம், பித்தப்பை, கல்லீரல் வலிமை பெறுகின்றன.

அடிவயிறு, குடல்களுக்கு நல்ல இரத்தம் பாய்ந்து ஜீரண சக்தி அதிகரிக்கிறது.

இரத்த ஓட்டத்தை சுறுசுறுப்பாக்குவதோடு வளர்ச்சிதை மாற்றத்தை மேம்படுத்துகிறது.

மேலும் இப்பயிற்சியால் வாய்வு, வயிற்றுவலி, நரம்புக்கோளாறுகள், நீரழிவு முதலிய நோய்கள் நீங்குகின்றன.

முதுகெலும்பு நன்கு நெகிழ்வுத் தன்மையை பெறுவதோடு முதுகெலும்பிலுள்ள நரம்பு தொகுதிகளும் நன்கு பலமடைகின்றன. தொடையெலும்புகளும் நன்கு வலிமை பெறுகின்றன.

பிட்யூட்டரி மற்றும் தைராய்டு சுரப்பிகளுக்கு இரத்தஓட்டம் அதிகரிக்கிறது.

Important note

முக்கிய குறிப்புகள்

இதயநோய் மற்றும் அதிக அளவில் இரத்த அழுத்த பிரச்சனை உள்ளவர்கள் இப்பயிற்சியை செய்யும்போது மிக கவனமாக இருக்கவேண்டியது அவசியம்.

கழுத்து, இடுப்பு, முதுகு வலி, முதுகில் பிரச்னை உள்ளவர்கள் இப்பயிற்சியை தவிர்க்க வேண்டும்.

குடலிறக்கம் மற்றம் வயிறு சார்ந்த பிரச்சனை உள்ளவர்கள் கண்டிப்பாக இந்த பயிற்சியை செய்தல் கூடாது. சமீப காலங்களில் வயிற்று பகுதிகளில் அறுவை சிகிச்சை செய்யப்பட்டிருந்தாலும் இந்த ஆசனத்தை தவிர்க்கவேண்டும்.

The post Patha Hastasana appeared first on Personality Fitting.

பாத பத்மாசனம்

நாம் இப்போது பார்க்க இருக்கும் பயிற்சியின் பெயர் பாத பத்மாசனம் (Baddha Padmasana – Bound Lotus). பெயருக்கேற்ப இதுவும் பத்மாசனம் போன்ற தோற்றத்தையே தருகிறது என்றாலும் அதிலிருந்து ஒருசில மாற்றங்களைக் கொண்டுள்ளன.

“பத்மாசனம்” பயிற்சியைப்பற்றி நாம் ஏற்கனவே பார்த்துள்ளோம். பிராணாயாமம் என்னும் மூச்சுப்பயிற்சி மற்றும் தியானப்பயிற்சி செய்வதற்கு அமரக்கூடிய அற்புதமான ஆசனம்தான் பத்மாசனம். இது உடலுக்கு உறுதியும் மனதிற்கு அமைதியும் தரவல்லது.

”பத்மம்” என்றால் தாமரையை குறிக்கும். ஆசனம் என்றால் இருக்கையை குறிக்கும்.

மடக்கி வைக்கப்பட்டிருக்கும் இரு கால்களும் பார்ப்பதற்கு தாமரை பூவின் இதழைப் போன்ற வடிவத்தில் காட்சி தருவதால் அதற்கு “பத்மாசனம்” என்று பெயர்.

நாம் இப்பொழுது அதே பத்மாசனப்பிரிவைச் சேர்ந்த… ஆனால்,… அதிலிருந்து சிறிது மாறுபட்ட “பாத பத்மாசனம்” என்னும் பயிற்சியை பற்றித்தான் இங்கு பார்க்க இருக்கின்றோம்.

 பத்மாசனத்தில் இருந்துகொண்டு இருகைகளால் இரு பாதங்களை பிடித்த நிலையில் இருப்பதால் இது “பாத பத்மாசனம்” என பெயர் பெற்றுள்ளது.

ஆனால்,… சமஸ்கிருதத்தில் இந்த ஆசனம் “பத்தா பத்மாசனம்” என அழைக்கப்படுகிறது. “பத்தா” என்றால் சமஸ்கிருதத்தில் “கட்டுப்பட்டது” அல்லது “கட்டப்பட்டது” என்று பொருள். பத்மாசனத்தில் அமர்ந்தபடி கைகளை முதுகுக்கு பின்னால் கொண்டுசென்று கால்களோடு சேர்த்து கட்டி வைக்கப்பட்டுள்ளது போன்றதொரு தோற்றத்தை தருவதால் இந்த ஆசனம் சமஸ்கிருதத்தில் “பத்தா பத்மாசனம்” என அழைக்கப்படுகிறது.

பாத பத்மாசனம் பயிற்சியை திறன்பட செய்யவேண்டுமெனில் முதலில் பத்மாசன பயிற்சியில் நன்கு தேர்ச்சி பெற்றிருக்க வேண்டியது அவசியம்.

ஏனெனில், பாதபத்மாசன பயிற்சிக்கு அடிப்படையாக அமைவது பத்மாசனமே…

Baddha Padmasana – Bound Lotus – Basic information

பாத பத்மாசனம் – அடிப்படைத் தகவல்கள்

பெயர் – Baddha Padmasana.

தமிழில் – பாத பத்மாசனம்.

சமஸ்கிருதம் – Baddha Padmasana – பத்தா பத்மாசனம்.

ஆங்கிலம் – Bound Lotus Pose.

வேறுபெயர்கள் – Bound Lotus Posture, Locked-up Lotus Pose.

ஆசனத்தின் நிலை – Sitting, Hand to Feet, Binding.

பயிற்சியின் கடின தன்மை – Advanced.

உடல் கோணம் – Stretch, Twist.

சரி, இனி இந்த ஆசனத்தை எவ்வாறு பயிற்சி செய்வது என்பதனை பார்ப்போம்….வாருங்கள் பார்க்கலாம்…

practice of – Baddha Padmasana

பாத பத்மாசனம் – செய்முறை

இந்த ஆசனமும் பத்மாசனம் போன்றே பயிற்சி செய்ய வேண்டுமென்றாலும் பத்மாசனத்தில் இரு கைகளையும் இரு தொடைகளின்மீது “சின்முத்திரை” நிலையில் வைத்திருப்போம். ஆனால் இந்த பாத பத்மாசனத்தில் இரு கைகளையும் முதுகுக்கு பின்னால் கொண்டு சென்று இரு பாதங்களிலுள்ள பெருவிரல்களை பிடித்தபடி வைக்கவேண்டும்.

ஒரு விரிப்பின் மீது இரண்டு கால்களையும் நீட்டியபடி உட்காரவும். முதலில் வலதுகாலை மடித்து கணுக்காலை இரு கரங்களாலும் பற்றி தூக்கி இடது தொடைமீது வைக்கவும்.

அதே போல் இடதுகாலை மடித்து இரு கரங்களாலும் பற்றி தூக்கி மெதுவாக வலது தொடைமீது வைக்கவும். இந்நிலையில் இரு கால்களின் குதிகால்களும் அடிவயிற்றை அழுத்தியபடி இருக்கவேண்டும். இரண்டு முழங்கால்களும் தரையை தொட்டபடி இருக்கவேண்டும்.

அதன்பின் இரண்டு கைகளையும் முதுகுக்கு பின்னால் கொண்டு சென்று வலது கையால் இடதுகால் பெருவிரலையும், இடது கையால் வலதுகால் பெருவிரலையும் பிடித்துக்கொள்ள வேண்டும்.

அதன்பின் இதே நிலையில் முதுகெலும்பு நேராக இருக்கும்படி நிமிர்ந்து உட்காரவும். மூச்சை நன்கு இழுத்து அதே வேளையில் மெதுவாக நேர்த்தியாக ஒரே சீராக விடவும்.

இந்நிலையில் ஓரிரு நிமிடங்கள் இருந்துவிட்டு அதன்பின் கால்களை மாற்றிப்போட்டு பயிற்சி செய்யவேண்டும்.

அதாவது வலது காலை மடிப்பதற்கு பதிலாக இப்பொழுது இடது காலை மடித்து இரு கரங்களாலும் பற்றி தூக்கி மெதுவாக வலது தொடைமீது வைக்கவும். அதன்பின் வலதுகாலை மடித்து கணுக்காலை இரு கரங்களாலும் பற்றி தூக்கி மெதுவாக இடது தொடைமீது வைக்கவும். முன்போல கைகளை பின்னால் கொண்டுசென்று பெருவிரலை பற்றிக்கொண்டு ஓரிரு நிமிடம் நிமிர்ந்து உட்காரவும். மூச்சை இயல்பாக விடவும்.

இவ்வாறு கால்களை மாற்றி மாற்றி 5 அல்லது 6 தடவை பயிற்சி செய்யவும்.

இது சொல்வதற்கு எளிதாக தோன்றலாம். ஆனால் செய்வதற்கு கொஞ்சம் கடினம். பழக பழக எளிதாகும்.

Benefits of Training

பயிற்சியின் பலன்கள்

இந்த ஆசனத்தை தொடர்ந்து பயின்றுவர முழங்கால்கள் நன்கு வலுப்பெறும். குதிகால் நரம்புகள் பலம் பெறும். மூட்டுவலிகள் நீங்கும்.

தோள்கள், கால்கள், கைகள் மற்றும் முதுகில் ஏற்படும் வலிகள் குணமாகும். வாதநோய், மூச்சுப்பிடிப்பு, சுவாசக்கோளாறுகள் நீங்கும்.

மார்புக்கூடு விரிவடையும். மலச்சிக்கல் நீங்கும். தொந்தி கரைவதோடு ஜீரணசக்தி அதிகரித்து சுறுசுறுப்பையும் உண்டாகும்.

புஜம், தோள்பட்டை, முதுகு பலம் பெறுவதோடு அந்தந்த உறுப்புகளிலுள்ள வலிகளும் குணமாகும்.

முழங்கை, மணிக்கட்டு, மார்பு முதலியன நன்கு வலிமை பெறும்.

இது இடுப்புப் பகுதியில் இரத்த ஓட்டம் அதிகரிக்க உதவுகிறது. இதனால் இனப்பெருக்க உறுப்புகள் மற்றும் செரிமான உறுப்புகள் அதிகம் பயனடைவதால் இந்த பயிற்சி பெண்களுக்கு ஏற்படும் மாதவிலக்கு பிரச்சனைகளுக்கு ஒரு நல்ல தீர்வாக அமையும்.

எனவே, இப்பயிற்சியை தொடர்ந்து பயின்றுவர நோயற்ற வளமான வாழ்வை பெறலாம் என்பதில் சிறிதும் ஐயமில்லை!!..

Important note

முக்கிய குறிப்புகள்

குடலிறக்கம், உயர் இரத்த அழுத்தம், இதய நோய்கள் உள்ளவர்கள் இந்த ஆசனத்தை தவிர்க்கவும். முதுகுவலி மற்றும் கண்வலி உள்ளவர்களும் இந்த ஆசனத்தை தவிர்த்தல் வேண்டும்.

பலவீனமான மூட்டுகள் உள்ளவர்கள் அல்லது மூட்டுகளில் வலி, முழங்கால், கணுக்கால்களில் வலி உள்ளவர்கள், இடுப்பு, முதுகு, தோள்பட்டைகளில் காயங்கள் உள்ளவர்கள் இந்த பயிற்சியை முற்றிலுமாக தவிர்க்கவேண்டும்.

இது வயிற்றுப் பகுதியில் அழுத்தத்தை ஏற்படுத்துவதால் கர்ப்பிணிப் பெண்கள் இந்த ஆசனத்தை கண்டிப்பாக முயற்சி செய்தல் கூடாது. குழந்தை பிரசவித்த பெண்கள் அதன்பின் 2 முதல் 3 மாதங்கள் வரை இந்த ஆசனத்தை தவிர்க்க வேண்டும். மாதவிடாய் காலங்களிலும் இந்த ஆசனத்தை தவிர்க்க வேண்டும்.

The post Baddha Padmasana – Bound Lotus appeared first on Personality Fitting.

பிறையாசனம்

Pirai Asana – Moon Pose. மனித உடல் நோயின்றி வாழ கடின உழைப்பு அவசியம். முன்பெல்லாம் அனைவருக்குமே கடின உழைப்பு இருந்தது. இதனால் ஆரோக்கியமும் குறைவில்லாமல் இருந்தது. ஆனால் இப்போதோ உழைப்பு என்றாலே அது பலபேருக்கு கடினமானதாக இருப்பதால் ஆரோக்கியமும் கேள்விக்குறியாகிவிட்டது.

எனவே இழந்த ஆரோக்கியத்தை மீண்டும் திரும்ப பெறவேண்டுமெனில் உழைப்புக்கு பதிலாக வேறு ஏதாவது மாற்று ஏற்பாடு செய்ய வேண்டியுள்ளது. இங்கேதான் நமக்கு கைகொடுக்க வருகிறது உடற்பயிற்சி.

பரபரப்பும் மன அழுத்தமும் மலிந்துகிடக்கும் இவ்வேளையில் வெறும் உடலுக்கு மட்டும் பயிற்சி அளிப்பதோடு நிறுத்திவிடாமல் மனதிற்கும் பயிற்சியளிக்க வேண்டியிருப்பதால் இக்கட்டான இந்த சூழ்நிலையில் நமக்கு கைகொடுக்க வருகிறது யோகாசன பயிற்சிகள்.

யோகாசன பயிற்சியில் பல கடினமான பயிற்சிகள் இருந்தாலும் ஆரம்பக்கட்ட பயிற்சியாளர்கள் பயிற்சி செய்வதற்கென சில எளிமையான பயிற்சிகளும் உள்ளன. முதன்முதலாக பயிற்சியில் ஈடுபடுபவர்கள் அப்படியான எளிமையான ஆசனங்களை தேர்ந்தெடுத்து பயிற்சி செய்வது சிறப்பு. அவற்றில் ஒன்றுதான் நாம் இப்போது பார்க்கப்போகும் “பிறையாசனம்” (Pirai Asana) என்னும் பயிற்சியாகும்.

இந்த பயிற்சி செய்யும்போது நம்முடைய உடல் வடிவம் “மூன்றாம் பிறை” போன்ற வடிவில் காணப்படுவதால் இதற்கு “பிறையாசனம்” என பெயர் பெற்றது. இந்த ஆசனத்தை “அர்த்த சக்ராசனம்” எனவும் குறிப்பிடுகின்றனர். அர்த்த சக்ராசனம் என்றால் “பாதி சக்ராசனம்” என்று பொருள்.

Pirai Asana – Moon Pose – Basic information

பிறையாசனம்

பெயர் – Pirai Asana.

தமிழில் – பிறையாசனம்.

சமஸ்கிருதம் – Pirai Asana.

ஆங்கிலம் – Arc of the Moon Pose.

வேறுபெயர்கள் – Ardha Chakrasana.

ஆசனத்தின் நிலை – Standing.

பயிற்சியின் கடின தன்மை – Beginner.

உடல் கோணம் – Back-Bend, Stretch.

இந்த பிறையாசன பயிற்சியில் உடல் பிறை வடிவில் அமைவதால் இது “பிறையாசனம்” என அழைக்கப்படுகிறது.

வாருங்கள் பிறையாசனம் பயிற்சி செய்யும் விதத்தை தெரிந்து கொள்ளலாம்.

Practice of Pirai Asana

பிறையாசனம் – செய்முறை

இரு கால்களுக்கிடையேயும் சுமார் இரண்டு அடி இடைவெளி இருக்கும்படி கால்களை அகட்டி வைத்துக்கொண்டு நேராக நிற்கவும். பின் இரு கைகளையும் தலைக்கு மேலாக நேராக உயர்த்தவும்.

அதன்பின் கைகளையும் உடலையும் மூச்சை உள்ளுக்கிழுத்தபடியே பின்னால் மெதுவாக வளைக்கவும். இந்நிலையில் உள்ளங்கை மேலே பார்த்தபடி இருக்கட்டும். 20 வினாடிகள் இதே நிலையில் இருக்கவும். மூச்சை இயல்பாக விடவும்.

சுமார் 20 வினாடிகள் கழித்து உடலை நேராக்கவும். சில வினாடிகள் ஓய்வுக்குப்பின் மீண்டும் முன்போலவே உடலை பின்னோக்கி வளைத்து பயிற்சி எடுக்கவும்.

இந்த ஆசனத்தை இரண்டு அல்லது மூன்று தடவை பயிற்சி செய்யவும். இதற்கு மாற்று ஆசனமாக விளங்குவது “பாத ஹஸ்தாசனம்“ (Patha Hastasana). எனவே பிறையாசன பயிற்சி முடிந்தவுடன் அடுத்த ஆசனமாக பாதஹஸ்த்த ஆசனம் செய்தல் வேண்டும்.

Benefits of Training

பயிற்சியின் பலன்கள்

இந்த பிறையாசன பயிற்சியால் முதுகுவலி, கழுத்துவலி நீங்குவதோடு முதுகுத்தண்டு நன்கு நெகிழும் தன்மையை பெறுகிறது. இருதயம் மற்றும் நுரைஈரலிலுள்ள தசைகள் நன்கு இழுக்கப்பட்டு இரத்த ஓட்டத்தைப் பெறுவதால் இரு உறுப்புகளும் நன்கு வலிமையைப் பெறுகின்றன.

இப்பயிற்சியால் உடம்பின் இரத்த அழுத்தம் சீராகிறது. சுவாசமண்டலத்தின் இயக்கம் மேம்படுகிறது. முதுகெலும்பு வளையும் தன்மையை பெறுகிறது. இதனால் முதுகு மற்றும் இடுப்பு பலம் பெறுகின்றன.

உடலிலுள்ள அத்தனை நாடிநரம்புகளும் தூண்டப்படுவதால் அனைத்து உறுப்புகளுக்கும் சுத்தமான இரத்தம் பரவி உடல் புத்துணர்ச்சி பெறுகிறது. இளமை மேலிடும். கூன்முதுகு நிமிரும்.

மார்புக்கூடுகள் விரிந்து நுரையீரல், சுவாச உறுப்புகள் சுறுசுறுப்படைந்து பலம் பெறுவதால் ஆஸ்துமா பிரச்சனையிலிருந்து விரைவில் விடுபடமுடியும்.

மேலும், இப்பயிற்சி இடுப்புக்கு நல்ல வனப்பையும், வலிமையையும் அளிக்கக்கூடியது.

Important note

முக்கிய குறிப்புகள்

நம்மால் எவ்வளவு பின்னால் உடலை வளைக்க முடியுமோ அவ்வளவு வளைத்தால் போதுமானது. முதுகில் வலி ஏற்படும் அளவில் உடலை வளைத்தல்கூடாது.

ஆரம்பத்தில் இதனை பயிற்சி செய்ய கடினமானதாக இருக்கலாம். தொடர்ந்து பயிற்சி செய்ய எளிதானதாக மாறும்.

இந்த ஆசனம் பயிலும்போது கால்மூட்டுகள் வளையாமல் இருக்கவேண்டியது அவசியம்.

கழுத்து பிரச்சனை மற்றும் தோள் வலி உள்ளவர்கள் இந்த பயிற்சி செய்வதைத் தவிர்க்கவேண்டும்.

The post Pirai Asana – Moon Pose appeared first on Personality Fitting.

அர்த்த சிரசாசனம்

Artha sirsasana. உடலிற்கும் மனதிற்கும் நலம் பயக்கும் பலவிதமான யோக ஆசனங்களை நாம் அவ்வப்போது தொடர்ந்து பார்த்து வருகிறோம். முந்தைய பதிவில் மூளைக்கு வளம் சேர்க்கும் சிரசாசனத்தைப்பற்றி தெளிவாக பார்த்தோம். ஆனால் இந்த சிரசாசனத்தை அனைவரும் எளிதாக பயில்வது சாத்தியமில்லை.

ஆசன பயிற்சியில் பலவருடம் தொடர்ந்து தேர்ச்சி பெற்றவர்களாலேயே சிரசாசனத்தை பிழையின்றி பயில முடியும்.

ஆனால், நாம் இப்போது பார்க்கப்போகும் ஆசனமானது அனைவராலும் எளிதாக பயிற்சி செய்யக்கூடியதாகவே அமைந்துள்ளது.

சிரசாசனம் பயிற்சி செய்ய விருப்பமுள்ளவர்கள் ஆரம்பத்தில் நாம் இப்போது பார்க்கப்போகும் ஆசனத்தில் நன்கு தேர்ச்சிபெற்றபின் சிரசாசனம் செய்ய தொடங்கலாம். இதுவும் சிரசாசனம் போலவேதான் என்றாலும் அதில் பாதி.

நாம் இப்போது பயிற்சி செய்யப்போகும் ஆசனத்தின் பெயர் “அர்த்த சிரசாசனம்” (Half Headstand).

Artha sirsasana – Basic information.

அர்த்த சிரசாசனம் – அடிப்படைத் தகவல்கள்.

பெயர் – Artha sirsasana.

தமிழில் – அர்த்த சிரசாசனம்.

சமஸ்கிருதம் – Artha sirsasana.

ஆங்கிலம் – Half Headstand pose on forearms.

வேறுபெயர்கள் – Artha sirsasana on forearms, Upward Facing Staff Pose.

ஆசனத்தின் நிலை – Prone, Forearms, Head and shoulders, Toe Balances, Arm Balances.

பயிற்சியின் கடின தன்மை – Intermediate.

உடல் கோணம் – Inversion, Stretch, Strength, Forward-Bend.

“அர்த்த” என்பது வடமொழிச்சொல். இதற்கு பாதி என்று பொருள். “சிரசு” என்றால் தலை என்று பொருள். எனவே அர்த்த சிரசாசனம் (Artha Sirsasana) என்றால் “பாதி சிரசாசனம்” என்று பொருள்படும்.

சிரசாசனத்தில் முழு உடலும் மேல்நோக்கியபடி அமைந்திருக்கும். ஆனால் இந்த அர்த்த சிரசாசனத்தில் தலையிலிருந்து இடுப்புவரை மட்டுமே மேல்நோக்கி இருக்கும் எனவேதான் இது பாதி சிரசாசனம் என்னும் பொருள்படும்படி “அர்த்த சிரசாசனம்” என அழைக்கப்படுகிறது.

சரி,.. இனி இதை எவ்வாறு பயிற்சி செய்வது என்பதை பார்ப்போம்.

Practice of Artha sirsasana

அர்த்த சிரசாசனம் – பயிற்சி முறை

கெட்டியான ஜமுக்காளத்தை நான்காக மடித்துப்போட்டு அதன்மேல் மண்டியிட்டு உட்காரவும்.

இரு கைகளின் விரல்களையும் பிணைத்து உள்ளங்கைகள் உங்களை நோக்கியிருக்கும் படி விரிப்பின்மீது அமைக்கவும்.

தலையை அந்த இரு உள்ளங்கைகளுக்கும் இடையில் தரையில் ஊன்றி இரு கைகளையும் தலையின் இரு பக்கங்களிலும் முட்டுக்கொடுத்து மூச்சை உள்ளுக்கு இழுத்து நிறுத்திக்கொண்டே இடுப்பை மேல்நோக்கி உயர்த்தவும்.

இரு கால்களையும் ஒருசேர வைக்கவும். இப்போது உங்கள் உடல் பார்ப்பதற்கு முக்கோண வடிவில் இருக்கும். உங்கள் உடலின் முழு பளுவும் இரு கைகளும், இரு கால்களும் தாங்கியபடி இருக்கவேண்டும். கண்களை மூடிக்கொண்டு மூச்சை சீராக விடவும்.

30 வினாடிகள் இதே நிலையில் இருந்து அதன்பின் கால்களை மடக்கி இயல்புநிலைக்கு வந்து முன்புபோல் மண்டியிட்டு உட்காரவும்.

தரையிலிருந்து தலையை தூக்கும் போது மெதுவாக தூக்கவும். வேகமாக தூக்கினால் சிலருக்கு தலைச்சுற்று ஏற்படலாம்.

சில வினாடிகள் ஓய்வுக்குப்பின் மீண்டும் முன்போல் இதே பயிற்சியை செய்யவும்.

இப்பயிற்சியை திரும்ப திரும்ப 3 முதல் 7 தடவைகள்வரை செய்துவரலாம்.

Benefits of Training

பயிற்சியின் பலன்கள்

இப்பயிற்சியால் தலைப்பகுதிக்கு இரத்த ஓட்டம் அதிகரிப்பதால் மூளை சுறுசுறுப்பு பெற்று ஞாபகசக்தி அதிகரிக்கிறது. எனவே இது மாணவர்களுக்கான ஒரு சிறந்த பயிற்சியாக கருதப்படுகிறது.

தலைசார்ந்த அனைத்து நோய்களும் நீங்குவதுடன் கண், காது, மூக்கு சார்ந்த பிரச்சனைகள் நீங்குவதுடன் கண்களும் கூர்மையடைகின்றன.

தலை, கழுத்து பகுதிகளில் அமைந்துள்ள பிட்யூட்டரி மற்றும் தைராய்டு சுரப்பிகளுக்கு செல்லும் இரத்தத்தின் அளவு அதிகரிப்பதால் உடலிலுள்ள பிரச்சனைகள் அனைத்தும் அகலுவதுடன் உடலும் சுறுசுறுப்படைகின்றன.

இப்பயிற்சியால் மூளையின் செயல்பாடு அதிகரிப்பதோடு கழுத்து, கை, கால், தோள் மற்றும் முதுகெலும்புகள் வலிமையடைகின்றன.

இருதயம் மற்றும் நுரையீரல்களின் செயல்பாடுகளும் அதிகரிக்கின்றன.

கூந்தல் வளர்ச்சியை அதிகரிப்பதுடன் முடி உதிர்தலை தடுத்து நிறுத்துகின்றன.

Important note

முக்கிய குறிப்புகள்

ஆண், பெண் இருபாலரும் இப்பயிற்சியை செய்துவரலாம் என்றாலும் தலையில் அறுவை சிகிச்சை செய்து கொண்டவர்கள், அதிக உடல் எடை உள்ளவர்கள், இரத்த அழுத்த கோளாறு உள்ளவர்கள், கண்நோய், காதுவலி, பல்வலி முதலியவைகளால் அவதியுறுபவர்கள், படபடப்பாக உணர்பவர்கள், கழுத்து மற்றும் முதுகுத்தண்டில் பிரச்சனை உள்ளவர்கள் இப்பயிற்சி செய்வதை தவிர்க்க வேண்டும்.

மேலும் இதய நோய் உள்ளவர்களும் இந்த பயிற்சியை கவனமாக கையாளவேண்டும்.

The post Artha Sirsasana appeared first on Personality Fitting.

சுகாசனம்

Sukhasana – Easy Pose. நீங்கள் அழகாக இருக்க விரும்புகிறீர்களா? அப்படியென்றால், நீங்கள் ஆரோக்கியமாக இருக்கவேண்டியது அவசியம்.

ஆரோக்கியம் வேண்டுமெனில் மனம் கவலைகளுக்கு உட்படாமல் மகிழ்ச்சியாக இருக்கவேண்டும்.

மனம் கவலைகளுக்கு உட்படாமல் மகிழ்ச்சியாக இருக்க வேண்டுமெனில் மனம் உணர்ச்சிகளுக்கு ஆட்பட்டு கொந்தளிக்காமல் பார்த்துக்கொள்ள வேண்டும்.

மனம் உணர்ச்சிகளுக்கு ஆட்படாமல் அமைதியாக இருக்க வேண்டுமெனில் அதற்கு முறையாக பயிற்சிகொடுக்க வேண்டும்.

அதற்கான பயிற்சியே “தியானம்“.

இந்த தியானப்பயிற்சியை பயில்வதற்கு என்று சில விதிமுறைகள் உள்ளன.

அந்த விதிமுறைகளில் ஒன்று நீங்கள் தியானப்பயிற்சிசெய்ய அமரும்போது உங்கள் உடல் எந்தவித சிரமமும் இல்லாமல் இயல்பாக இருக்கவேண்டும். அதேவேளையில் உறுதியாகவும் இருக்கவேண்டும்.

அப்படியென்றால்தான் உங்களால் பல மணிநேரம் சிரமமில்லாமல் தியானத்தில் உட்காரமுடியும்.

அதேவேளையில், உங்கள் உடல் வளையாமலும் கூன்விழாமலும் முதுகு செங்குத்தாக நேராக இருக்க வேண்டியது அவசியம். கூன்விழுந்த முதுகோடு தியானமோ அல்லது மூச்சுப்பயிற்சியோ செய்தீர்கள் என்றால் அது உடலில் பலவித பக்கவிளைவுகளை ஏற்படுத்தக்கூடும்.

எனவேதான், “பிராணயாமம்” என்னும் மூச்சுப்பயிற்சி மற்றும் தியானப்பயிற்சி செய்யும்போது கடைபிடிக்கவேண்டிய விதிமுறைகளையும் உட்காருவதற்கான சில ஆசன முறைகளையும் சித்தர்களும் யோகிகளும் வகுத்துதந்துள்ளார்கள்.

ஆசனம் என்பது உடலை ஒரு குறிப்பிட்ட நிலையில் ஆடாமல் அசையாமல் நெடுநேரம் வைத்திருப்பதைக் குறிக்கும். உடல் அசையாமல் இருந்தால்தான் மனமும் அசையாமல் நிலைபெறும். மனம் அசையாமல் நிலைபெற்றால்தான் தியானமும் கைகூடும்.

தியானத்திற்கான ஆசனங்கள்

உடலை வளப்படுத்த பல ஆசனங்கள் உள்ளன என்றாலும், தியானப் பயிற்சிகளுக்காக சில தனிப்பட்ட ஆசனங்கள் மட்டுமே பரிந்துரைக்கப்பட்டுள்ளன. அவைகளில் குறிப்பிட்டு சொல்ல வேண்டுமென்றால் பத்மாசனம், சித்தாசனம், சோமாசனம், வஜ்ராசனம், ஸ்வஸ்திகாசனம், கோமுகாசனம் ஆகியவைகளைக் குறிப்பிடலாம்.

இதில் பத்மாசனம், சோமசனம், வஜ்ராசனம் முதலியனவற்றில் எடுத்த எடுப்பில் உட்காருவதென்பது அனைவராலும் முடியாத காரியம். சில மாதங்கள் முறையாக பயிற்சியெடுத்து உடலை பழக்கப்படுத்தினால் மட்டுமே இதில் நெடிய நேரம் உட்காருவது சாத்தியம். இப்படியானவர்கள் பழகுவதற்கு எளிதாக உள்ள சித்தாசனம், ஸ்வஸ்திகாசனம், கோமுகாசனம் இவைகளில் ஏதாவதொன்றில் உட்கார்ந்து மூச்சுப்பயிற்சி மற்றும் தியானம் பயிலலாம். இதுவும் கடினமாக இருப்பதாக உணர்பவர்கள் சுகாஸனத்தை பயிற்சி செய்யலாம்.

ஆம்,… உடல் பருமனாக இருப்பவர்களால் எந்த ஆசனத்திலும் உட்கார முடியாது. அதற்காக அவர்களை கைவிட்டுவிட முடியுமா?… அவர்களும் சாதிக்க துடிப்பவர்கள்தானே… அவர்களுக்கும் தியானம் முதலியன செய்து அலைபாயும் மனதை ஒருமுகப்படுத்தி வாழ்க்கையை வாழ்வாங்கு வாழவேண்டும் என்ற ஆசை இருக்கும்தானே….

அவர்களுக்காக உருவாக்கப்பட்டதுதான் இந்த சுகாசனம். அதாவது சம்மணம் போட்டுகொண்டு ஜம்மென்று உட்காருவதுதான் இந்த ஆசனத்தின் ஹைலைட் பயன்பாடு. “அட்ரா சக்க… “அட்ரா சக்க”….

அட இது அழகா சவுகரியமாக இருக்குதேன்னு வாழ்நாள் பூராவும் சம்மணம் போட்டுக்கிட்டே உட்கார்ந்துடாம கொஞ்சம் கொஞ்சமா முன்னோக்கி நகரணும் புரிஞ்சுதா….

சில மாதங்கள் இந்த சுகாசனத்துல உட்கார்ந்துக்கிட்டு… அப்புறம் அதற்கு அடுத்த கட்டமாக சித்தாசனம், ஸ்வஸ்திகாசனம், கோமுகாசனம் முதலிய ஆசனங்களில் உட்கார கொஞ்சம் கொஞ்சமாக உடலை பழக்கப்படுத்த வேண்டும்.

மேற்குறித்த ஆசனங்களில் உட்காருவதற்கு தேகத்தை பழக்கப்படுத்திய பின்பு அதற்கு அடுத்த கட்டத்திற்கு நகரலாம். அதாவது சித்தாசனம்,  வஜ்ராசனம், பத்மாசனம் முதலிய ஆசனங்களை பயிற்சி செய்யலாம்.

சரி,.. நாம் இப்போது உட்காருவதற்கு மிக எளிதான “சுகாசனம்” செய்வது எப்படி என்பதனைப் பார்ப்போம் வாருங்கள்….

Sukhasana – Easy Pose – Basic information

சுகாசனம் – அடிப்படைத் தகவல்கள்

பெயர் – Sukhasana.

தமிழில் – சுகாசனம்.

சமஸ்கிருதம் – Sukhasana.

ஆங்கிலம் – Easy Pose.

வேறுபெயர்கள் – Easy Sitting Pose.

ஆசனத்தின் நிலை – Sitting.

பயிற்சியின் கடின தன்மை – Beginner.

உடல் கோணம் – Restorative, Meditative.

“சுகாசனம்” (Sukhasana) என்பது மிகவும் எளிதானது. நாம் சாதாரணமாக சம்மணம் போட்டு உட்காருகிறோமல்லவா அதுவே சுகாசனம்.

எந்த ஆசனத்தில் உட்கார்ந்தாலும் முதுகு கூன்விழாமல் நேராக இருக்க வேண்டியது அவசியம். எனவே முதன்முதலாக மூச்சு பயிற்சி மற்றும் தியானம் செய்பவர்கள் முதலில் எளிமையான சுகாசனத்தில் அமர்ந்து பயிற்சி மேற்கொண்டு அதன்பின் ஸ்வஸ்திகாஸனம், சோமாசனம், பத்மாசனம் என கடினமான பயிற்சிகளை படிப்படியாக மேற்கொள்ளலாம்.

சரி, இனி இந்த ஆசனத்தை எவ்வாறு பயிற்சி செய்வது என்பதனை பார்ப்போம்….

Practice of Sukhasana

செய்முறை விளக்கம்

ஒரு கெட்டியான ஜமுக்காளத்தை நான்காக மடித்து கீழே விரித்துக் கொள்ளுங்கள். விரிப்பின்மீது இருகால்களையும் நீட்டி உட்காருங்கள். அதன்பின் வலது முழங்காலை மடித்து பாதத்தை இடது தொடையின் கீழ் வைக்கவும். அதன்பின் இடது முழங்காலை மடித்து பாதத்தை வலது தொடையின் கீழ் வைக்கவும். இது சாதாரணமாக நாம் சம்மணம்கூட்டி அமர்வதுபோலத்தான். ஆனால் முதுகு நேராக இருக்கும்படி நிமிர்ந்து உட்காரவேண்டியது மிகமிக முக்கியம். அப்படி நிமிர்ந்து உட்காரும்போது உடலை தம்கட்டி விறைப்பாக வைக்காமல் இயல்பாக வைத்துக்கொள்ள வேண்டியதுவும் அவசியம்.

வலது உள்ளங்கையை சின்முத்திரையுடன் வலது கால் முட்டியின் மீதும் இடது உள்ளங்கையை சின்முத்திரையுடன் இடதுகால் முட்டியின்மீதும் வைக்கவும்.

முதுகு, கழுத்து, தலை முதலியனவற்றை வளைக்காமல் அதேவேளையில் விறைப்பாகவும் வைக்காமல் செங்குத்தாக ஒரே நேர்கோட்டில் வைத்திருக்க வேண்டியது மிக மிக முக்கியம்.

இதுவே சுகாசனம். இந்த ஆசனத்தை செய்வது எளிதானது. இன்னும் பிற ஆசனங்களைப்போல உடலை வருத்தாமல் சுகமாக வைத்திருப்பதால்தான் இதற்கு சுகாசனம் என பெயர்.

ஆரம்பகட்ட மூச்சு பயிற்சி மற்றும் தியானப்பயிற்சிக்கு இந்த ஆசனத்தை பயன்படுத்தி வரலாம். 5 நிமிடத்தில் தொடங்கி 1 மணிநேரம் வரை இதில் அமரலாம். அதன்பின் அதிக பலன்தரும் சித்தாசனம், பத்மாசனம், சோமாசனம், ஸ்வஸ்திகாசனம் முதலியவைகளை பயிற்சிசெய்து தியானத்திற்கு பயன்படுத்திக்கொள்ளலாம்.

Benefits of Training

பயிற்சியின் பலன்கள்

இந்த பயிற்சி உடலை சுறுசுறுப்பாக வைக்கிறது. வயிறு சார்ந்த அனைத்து பிரச்சனைகளையும் சரி செய்கிறது. இடுப்பு, முதுகு வலுப்பெறுகிறது. மனது அமைதி பெறுகிறது. ஆரம்பகட்ட மூச்சுப்பயிற்சி மற்றும் தியானப்பயிற்சிகளுக்கு மிகவும் ஏற்றது.

Important note

முக்கிய குறிப்புகள்

முழங்கால், இடுப்பு பகுதிகளில் காயம்பட்டவர்கள் இந்த ஆசனத்தை கவனமுடன் பழகுதல் வேண்டும்.

முதுகு மற்றும் இடுப்பு பகுதிகளில் அறுவை சிகிச்சை செய்துகொண்டவர்கள் இந்த ஆசனத்தில் அதிக நேரம் இருத்தல் கூடாது.

The post Sukhasana – Easy Pose appeared first on Personality Fitting.